D Vampiire läbe

oder jede Bluetsuuger wott hütt' Gäld

A dr Süschee-Sitzig vo euserer Gugge
Tuets Marian mit eme Vorschlag userugge
Mir chönnte doch als Vampiir a d Fasnacht go
Me schtimmt grad ab und dr gröschti Teil seit jo
Jetz laufe mir halt mit ere bluetige Schnuure
Am Umzug bi de Zueschauer vorneduure
Und nach dreidaag Gugge und drei Nächt schränze
Föh eusi Müüli denn rot afoh glänze
Eusi Lippe si bluetig wie em Dracula si Schnuure
Eso gseh schtimmt euser Süschee nöimeduure
Numme dr DJ Popo dä gottbegnadigti Sänger-Chnab
isch mit sim Bluetsuuger-Lied ganz bös d’Schissgass duurab
vermasslet öis dr Text für dä Vampiir-Zöödel
Ig chönnt däm eis schwinge, däm Super-Döödel
Weisch wie mir das schtinggt – all Johr heissts efang
Schwitzerland zero points – leider wiider letschte Rang
Fertig mit DJ’s, mit Schpinner  und angere Deppli
Jetz schigge mir doch s’nechscht’ Johr dr Schacherseppli
Und e Guggemuusig, wo im Hingergrund „ewigi Liebi“ schränzt
Muesch luege wie d’ Schwiiz z’oberscht uf dr Ranglischte glänzt
Denn si die Bschisser und Oschtblogg-Intrigante
Blötzlich für öis numme no Punkte-Liiferante
Öis Vampiire cha me wiider i d’ Motte-Chischte versorge
Denn bluetsuuge tie nach-wie-vor Angeri bsorge
Denn s’ höchschte Ziil uf dere liebe Wält
Isch für die einte Macht – für die Angere Gäld
D’Mänetscher suuge Gäld, d’Poliddiger Macht
Über d’Duuble wo schaffe wird heimlich glacht.
Als Büezer und Mittelstand chasch nid verstoh
Wieso hett die no nie dr Töifel gno
Scho i dr Bible schtoh gschriibe s sige alli Lüüt glich
Die eine halt arm und die angere schtingg riich
Und eis isch klar, so fungtzioniert d’Macht
Hingeduure dräggele, wenn me vorneduure lacht
Mit Hingerlischt wird regiert und manipuliert
Und Lüüt wo eim nid passe use katapultiert
Me bschisst, bi de Rächte, i dr Mitti bi de Lingge
Die Gschäftli tie nundedie zum Himmel schtingge
D Regierig bi eus im Schtadthuus inne
Tuet gottlob nid söttigi Mätzli spinne
Hei wichtigi Theme, hei angeri Problem
Was isch, wenns Hochwasser scho wiider cheem
Ab richtige Problem wärde die schampar muff
Zum Bischpiil im Baslerhof s plante Buff
Oder em Schteiner Urs si Kunschtrase Aatagge
Wie lang hoggt d UBS no i ihrer Wällblächbaragge
Wie sell me verdelli s Amtshuus-Areal gschtalte
Bim Schteiner, resp. dr Krüsi Parzelle blibt alles bim alte.
Wei mer i dr Bleiholle d’ Wasserleitige saniere
Drmit nid nonemool öbbis tuet passiere
Mit deene dört use isch nämmlig nid z schpasse
Drumm sett me jetz ändlich s Rägewasser fasse.
Wei mer d’Schtroos i de Gasse fertigschtelle 
Hett s Poschtauto nid e nöie Pargplatz welle?
Denn fehlt no öbbis bi öis do z Laufe
Mir miesse no dr nöii Finanzblatz taufe
E Fuessgängerschtäg über d’Birs sell’s no gäh
Und witters ghört me dr Schtadtroot vernäh
E Hochwasser-Alarm-System wer guet
Wenn d’ Birs wiider emoole überschwemme tuet
Witters ghört me se verzelle
Wo wei mer jetz d Turnhalle aneschtelle
DAS si Problem wo bim Schtadtroot zelle
Das hei mir doch no säge welle
Und i eim do simer alli zämme schlüssig
Vampiire si z Laufe zimmli überflüssig.

Dr Jö